ഓണത്തിനൊരു ചെറു പൂക്കളം തീർക്കുവാൻ
ഒരുപിടി പൂക്കളിറുത്തു ഞങ്ങൾ
ചേലുള്ള പൂക്കളിറുക്കുവാനങ്ങനെ
ഓണപ്പുടവ ഉടുത്തു ഞങ്ങൾ
ഒന്നല്ല രണ്ടല്ല ഓരിലക്കുമ്പിളിൽ
ഒത്തിരി പൂക്കളിറുത്തു ഞങ്ങൾ
ഓണമൊന്നീ തിരുമുറ്റത്തൊരുക്കുവാൻ
ഒന്നിച്ചു വന്നോണ തുമ്പികളും
ഒരു ചെറു വൃത്തത്തിൽ ഒരുപിടി പൂവിട്ടു
ഒരുമലർ പൂക്കളം തീർത്തു ഞങ്ങൾ
ഈ മലർ പൂക്കളം കാണുവാൻ മാവേലി
മന്നൻ വരുന്നത് നോക്കി ഞങ്ങൾ
മാവേലി മന്നനു സന്തോഷമാകുവാൻ
ഓണസദ്യയൊരുക്കി ഞങ്ങൾ
ഓണപ്പാട്ടുകൾ പാടിക്കൊണ്ടങ്ങനെ
ഓണക്കളികൾ കളിച്ചു ഞങ്ങൾ
തുമ്പക്കുടമതിൽ പാലടവച്ചിട്ട്
ഓണനിലാവു വരവേറ്റു ഞങ്ങൾ...
