ഉഗ്രപ്രതാപമോടുൾക്കടൽ തേടുന്നു
ഉച്ചനീചത്വമറിഞ്ഞിടാത്തവർ.
ഉയിരുകൊടുത്തും ഉൾക്കാമ്പ് നേടുന്നു
ഉയരങ്ങളെന്തെന്നറിഞ്ഞിടാത്തവർ.
ഉന്മാദമോടെ വിഹരിക്കുന്നിവർ
ഉദ്വേഗമെല്ലാം കൈവെടിഞ്ഞ്.
നിരതെറ്റിയുണരുന്ന ദു:ഖക്കയങ്ങളിൽ,
നിർവൃതിയോടെ നിറഞ്ഞു നിൽക്കും.
പച്ചമീനിൻ്റെ ഗന്ധമുണരുന്ന
പച്ച മാംസത്തിൻ പരിരംഭണം.
ഒത്തുനോക്കുവാൻ സമയമില്ലാതെ,
എത്തിപ്പിടിക്കുന്ന സൗഹൃദങ്ങൾ.
നക്ഷത്രം നോക്കി നയിക്കുന്ന ജീവിതം,
നഷ്ടങ്ങളെന്തേ വരുത്തിവയ്ക്കുന്നു?
നാന്ദികുറിച്ചിടാം കടലിൻ മക്കൾക്കായ്,
ത്യാഗം സഹിക്കാം ഇനിയുള്ളനാളുകൾ.
ആഴക്കടലിൻ്റെ തീരത്തണഞ്ഞിടാം,
ആശ്വാസവചനങ്ങൾ ചൊല്ലിക്കൊടുക്കാം.
